Sukalde profesional honetan, egunero 26.000 plater prestatzen dituzte. Guztira, 13.000 menu dira eta eskola, egoitza eta enpresetan banatzen dituzte. Gastronomia Baska enpresak Mungian dituen instalazioak dira. Menu hauek egiteko ehunka olio litro erabiltzen dituzte.
JOSÉ LUIS ZAITEGUI; Gastronomía Baska: Egunean 400 litro olio erabiltzen dugu, astean 2000 litro inguru.
Azken hilabeteetan sukaldean erabiltzen duten olioa birziklatzen hasi dira. Erregai moduan berrerabiltzen dute galdara berri honetan. Olio erabilia eta gasolioa nahasten dituzte erregaia lortzeko. Biak kantitate berean.
JOSÉ LUIS ZAITEGUI; Gastronomía Baska: CO2 isurketak aurrezten ditugu. Kamioiak ez dira etorri behar gure olioa jasotzera eta horrela gasolio gutxiago gastatzen dute. + Galdarari dagokionez, oraindik ez dugu urtebeteko epealdia bete, baina hilean 1000 euro aurreztu ditzakegula uste dugu, urtean 12.000 euro inguru.
Gasteizen diseinatu eta sortu duten galdara honek Biofell du izena. Tifell enpresak eta ikerlan-Ik4 teknologia zentroak elkarlanean egindako ikerketaren emaitza da. Erregai nahasketa ezberdinekin erabil daiteke. Horixe da galdara honen berezitasun nagusia.
Besteak beste bioerregaiekin, landare-olio eta gasolio nahasketekin, eta baita sukaldean erabilitako olioa gasolioari gehituta ere.
RICARDO MARÍN; Ik4-Ikerlan :Galdara ekologikoagoak egin nahi genituen, orain arte lortutako erreketa maila on eta garbiak mantenduz. Berogailuetarako hainbeste erregai fosil erabili ordez, nekazal jardueratik lortutako produktuen erabilera bultzatzea pentsatu genuen.
Baina, nola funtziona dezake galdara batek erregai nahasketa ezberdinekin? Ohiko gasolio galdara batek dituen elementuak moldatu, birdiseinatu behar izan dituzte ikerketa honetan. Erregai nahasketa ezberdinei egokitu ahal izateko. Hauxe da eraldatu duten elementuetako bat: erregailua.
Gune honetan elkartzen dira erregaia eta airea, eta ondorioz errekuntza gertatzen da. Erregailu tradizional batean erregaia injektatzen duen ponpak eta haizagailuak motor bakar batekin egiten dute lan. Izan ere, galdara horietan aire eta gasolio nahasketa beti berdina da.
RICARDO MARÍN; Ik4-Ikerlan:Galdaran erabili nahi genituen erregaien nahasketak aztertu genituen eta ohartu ginen nahasketa bakoitzak aire-erregai proportzio ezberdina behar zuela erreketarako.
Horregatik erretzaile berri hau diseinatu dute. Kasu honetan, haizagailuak eta erregaia injektatzeko ponpak, bakoitzak bere motorra du. Nahasketa bakoitzari dagokion aire- erregai proportzio egokia emateko.
Elementu berri horrekin, galdara prest dago erregai nahasketa ezberdinak probatzen hasteko. Lehenengo analisia bioerregaiekin egin dute.
JOSÉ IGNACIO FERNÁNDEZ DE MENDIOLA ; Tifell Electro Solar: Gasolioa bioerregaiekin nahasteari ekin genion, %10arekin hasi eta %100 a lortu arte. Galdararen errendimendua ona zela ikusi genuen eta berotegi efektuko gasen emisioen emaitzak ere oso onak zirela. Bioerregaiekin galdara egoera ezin hobean zegoen.
RICARDO MARÍN; Ik4- Ikerlan:Zenbakiei erreparatzen hasi ginen unean iritsi ziren arazoak. Bi parametro horien neurketen emaitzak oso onak ziren, baina bioerregaien kostua gasolioarenarekin alderatuta bikoitza da.
%100ean bioerregaiak erabilita galdara arazorik gabe dabil. Baina, aukera hori garestiegia da. Erregai merkeagoen bila landare-olioak izan dira ikertzaileen hurrengo aukera: koltza-olioa, soja-olioa eta sukaldean erabilitako olioa probatu dituzte.
JOSÉ IGNACIO FERNÁNDEZ DE MENDIOLA; Tifell Electro Solar: Ordura arte inork ez zuen sukaldeko olio erabiliarekin ikerketa hori egin.
Landareetatik eratorritako olioek ordea, arazo bat dute: biskositatea. Biskositateari dagokionez, landare olioen eta biodiesel erregaiaren arteko aldea nabarmena da. Eta azalpen erraza du gainera. Biodiesela egiteko, landare olioei osagai likatsuak kentzen dizkiete. Horregatik biodiesela, jatorrizko olioa baina finagoa da.
RICARDO MARÍN; Ik4- Ikerlan: Biskositatea arazo bat da. Erregai likidoarekin dabiltzan erregailuek, likido hori injektore baten laguntzaz lainoztatzen baitute. Likidoa likatsua bada, zailagoa izango da injektoretik igarotzea.
Landare-olioekin egindako nahasketen biskositatea neurtzeko aparailu hau garatu dute. Honi esker, erabiltzaileak jakin ahal izango du nahasketak errekuntzarako baldintza egokiak betetzen ote dituen. Giro hotzeko egunetan, olioaren biskositateak nabarmen egiten du gora, hortaz aparailu hau bost gradutik beherako egunetan izango da bereziki lagungarria.
Galdara dagoeneko merkatuan da eta nahasketa hauekin egin dezake lan: Gasolioa eta sukaldean erabilitako olioa %50 eko proportzioan nahastuz. Landare olioen kasuan, nahasketaren %70a koltza eta soja olioa izango da, eta %30a berriz, gasolioa.
ROCARDO MARÍN; Ik4- Ikerlan: Aingeru urdina izena duen label europar bat dago, alemaniarra da, eta emisioei dagokienez Europako araurik zorrotzena da. Ba kasu honetan lortu dugun kutsadura maila, arau horren azpitik dago.
JOSE IGNACIO FERNÁNDEZ DE MENDIOLA; Tifell Electro Solar:Ingurugiroa gutxiago kutsatzen du galdarak . Eta galdara tradizionalekin alderatuz gutxiago kutsatu eta gehiago aurrezten du.
Sukaldean erabilitako olioa galdaran berrerabili nahi duenak ondo iragazi beharko du. Ura eta janari arrastoak kentzea ezinbestekoa da, galdarak arazorik izan ez dezan. Galdarak ezaugarri gehiago ere baditu: kondentsazio bidezko galdara bat da, lurrunaren kondentsazioa baliatzen du. Gainera, erabiltzaileak galdararen potentzia uneoro erregulatu dezake , eta nahi izanez gero eguzki panelen bidez ura berotzeko aukera ere ematen du.
